Illustration by Mosab Zkaria

Moyo hupenda kizuri, na pia chenye thamani,
Na hata uwe jabari, huingia mtegoni,
Utapenda cha fahari, kinachogusa moyoni,
Taarab za zamani, muziki ulo laini,

Sauti za waimbaji, ni nzuri ziso kifani,
Mungu kawapa kipaji, usiulize kwa nini,
Na tuwavishe mataji, yalo mazuri kichwani,
Taarab za zamani, muziki ulo laini,

Tusitupe mila zetu, tukafata za wageni,
Hiyo ni hazina yetu, na yenye kubwa thamani,
Kutoka mababu zetu, walitwachia zamani,
Taarab za zamani, muziki ulo laini,

Huimba kwa taratibu, wakiwepo jukwaani,
Hakika huoni tabu, kusikiliza yakini,
Masuali na jawabu, hupatikana nyimboni,
Taarab za zamani, muziki ulo laini,

Hizi ni nyimbo asili, ya wetu utamaduni,
Tusiitupe asili, tukaiwacha jaani,
Tupende na kukubali, mila zetu za zamani,
Taarab za zamani, muziki ulo laini,

Muziki wenye kanuni, umejaa ubunifu,
Vyombo hivyo vya zamani, vilipigwa bila khofu,
Na ukiwa jukwaani, hausikii uchofu,
Taarab za zamani, muziki ulo laini,

Taarabu ina raha, unaihisi moyoni,
Ikiwa moyo wahaha, utapata burudani,
Tulia upate raha, unapokuwa nyumbani,
Taarab za zamani, muziki ulo laini,

Part of SAWTI Zine Issue 1
SABRA ALI AMRANI
SABRA ALI AMRANIPOET
Sabra Ali Amran, nimezaliwa Zanzibar. Nimesoma katika shule za msingi Mtendeni na Msasani. Shule ya sekondari ya Forodhani zote zilizopo Dar es salam. Ninamiliki stashahada ya juu ya uhasibu (Advanced Diploma in Accountancy) niliyoipata Chuo cha cha usimamizi wa fedha (IFM).Kilichopo Dar es salaam. Pia ninamiliki C.P.A-I (T) (Certificate Public Accountancy ) ya Bodi ya Taifa ya wakurugenzi na wahasibu (NBBA). Kipaji changu ni uigizaji wa filamu,utunzi wa hadithi na mashairi. Nimeigiza filamu : Kisasi cha Utata, Eda, Ramadhani Kareem, Boxera na Kaundime. Nimetunga vitabu vya hadithi: Sikitiko na Tabasamu la Huba.